Samia Suluhu Hassan yarahiriye kuyobora Tanzania

MU MAHANGA POLITIKI
Sangiza iyi nkuru abandi

Samia Suluhu Hassan amaze kuvuga indahiro yo kuba Perezida wa Tanzania, mu muhango wabereye mu ngoro y’umukuru w’igihugu cya Tanzania.

Samia ahagaze imbere y’ukuriye ubucamanza Prof. Ibrahim Juma yasubiyemo ubugira gatatu indahiro y’umukuru w’igihugu mu cyumba gifunze cyuzuyemo abantu, mu muhango waciye kuri televiziyo y’igihugu uri kuba.

Samia abaye perezida wa gatandatu wa Tanzania, ndetse aba perezida wa mbere w’umugore uyoboye iki gihugu. Yahise atambuka guca imbere y’akarasisi ka gisirikare, nk’umugaba w’ikirenga w’ingabo.

Samia w’imyaka 61, ubu ni we mugore wenyine muri Africa ukuriye igihugu mu rwego rwa politiki – kuko perezida wa Ethiopia ari ahanini uw’icyubahiro.

Uyu mugore yiyongereye ku rutonde rutoya rw’abagore bategetse ibihugu byabo kuri uyu mugabane.

Samia yabaye Visi Perezida kuva mu mwaka wa 2015, ubu agiye gusimbura Perezida John Magufuli wapfuye ku wa gatatu, leta igatangaza ko yazize ibibazo by’umutima.

Samia abaye Perezida wa kabiri mu mateka ya Tanzania ukomoka mu birwa bya Zanzibar, uwa mbere yari Ali Hassan Mwinyi, wategetse Tanzania imyaka 10, kuva mu 1985 kugeza mu 1995.

Ubu ni nabwo bwa mbere Tanzania ipfushije Perezida akiri ku butegetsi, uwari umwungirije akamusimbura.

Leave a Reply

Your email address will not be published.