Perezida Kagame n’umufasha we bakingiwe Coronavirus

MURWANDA POLITIKI UBUZIMA
Sangiza iyi nkuru abandi

Perezida wa Repubulika y’u Rwanda n’umufasha we Jeannette Kagame,kuri uyu wa 12 Werurwe 2021,bakingiwe Coronavirus.

Ni amakuru yatangajwe n’Ibiro by’Umukuru w’Igihugu(Village Urugwiro),aho bivuga ko iki gikorwa cyabereye ku bitaro byitiriwe Umwami Faisal,i Kigali.

Ku manywa yo kuri uyu wa Kane nibwo Perezida Kagame na Madamu Jeannette Kagame bakingiwe Covid-19. Ni igikorwa cyabereye ku Bitaro byitiriwe Umwami Faisal ku Kacyiru mu Mujyi wa Kigali.

Umukuru w’Igihugu yahawe uru rukingo hashize iminsi itandatu u Rwanda rutangiye gukingira. Mu gihugu hose, abantu barenga ibihumbi 230 nibo bamaze guhabwa uru rukingo rwa Covid-19.

Minisitiri w’Ubuzima, Dr Ngamije Daniel, ni umwe mu bayobozi bari bahari ubwo Perezida Kagame yakingirwaga.

Ku wa 03 Werurwe ubwo inkingo zageraga i Kigali, Perezida Kagame yagaragaje ko ari intambwe itewe kuba u Rwanda na Afurika muri rusange bigiye gukingira abaturage babyo.

Ati “Habayeho gutegereza igihe kirekire, bamwe bakoze ibikenewe neza ndetse bari biteguye… twirengagije ko hari bamwe bagaragaye ‘nk’abari hejuru y’abandi’ kandi mu gihe twese tuzikeneye mu buryo bwihuse. Ubu ni amakuru meza kubona inkingo za COVID-19 zigera muri Afurika hatangiriwe kuri Ghana… muri iki gitondo u Rwanda n’abandi. Murakoze #Covax.”

Umukuru w’Igihugu cyo kimwe n’abandi bakingiwe Covid-19 bagomba guhabwa urukingo inshuro ebyiri, ni ukuvuga ko nyuma y’ibyumweru bine bazahabwa urundi.

Perezida Kagame yakingiwe Coronavirus
Umufasha we Jeannette Kagame na we yakingiwe