Nyanza:Ndayizera Phocas yongeye guhakana ibyaha aregwa avuga ko yabyemeye ku gahato

MURWANDA POLITIKI
Sangiza iyi nkuru abandi

Uwahoze ari umunyamakuru wigenga, Ndayizera Phocas, yongeye kuvuga ko yakorewe iyicarubozo kugira ngo yemere ibyaha by’iterabwoba aregwa ndetse ko yanabisinyishijwe ku ngufu.

Ibi Ndayizera yabivuze uyu munsi, ubwo Urukiko ruburanisha ibyaha by’iterabwoba rwamuhaga umwanya n’abandi 13 bareganwa ngo bavuge ku gihano cyo gufungwa burundu basabiwe n’ubushinjacyaha.

Ndayizera, wabanje kuburirwa irengero akerekanwa n’abapolisi hashize icyumweru, yahakanye umugambi w’iterabwoba ashinjwa. Yavuze ko ubushinjacyaha bwivugiye ko uwo mugambi wacuzwe n’ishyaka RNC, ritavuga rumwe n’ubutegetsi bw’u Rwanda, rikawunyuza kuri Ntamuhanga Cassien watorotse gereza agahungira muri Mozambique.

Yakomeje kandi ahakana amajwi yifashishwa n’ubushinjacyaha mu kumushinja, avuga ko byumvikana ko amwe ari amajwi yafatiwe muri studio, atandukanye cyane n’amajwi yaciye ku minara ya telephone.

Uruhande rwa Ndayizera rwavuze ko runenga raporo y’ubushinjacyaha ku biturika bwavuze ko yafatanywe, ruvuga ko hari indi raporo yerekanye ko ibyo bintu berekana bidaturika.

Biteganijwe ko ejo kuwa kane, ari bwo uru rukiko rukorera i Nyanza mu majyepfo ruzakomeza kumva abandi baregwa bavuga ku gihano basabiwe n’ubushinjacyaha.

Leave a Reply

Your email address will not be published.