‘Ntaho nari mpuriye na FNL’ Paul Rusesabagina

POLITIKI
Sangiza iyi nkuru abandi

Paul Rusesabagina uri kuburana urubanza rw’ubujurire ku ifungwa n’ifungurwa ry’agateganyo mu Rukiko Rwisumbuye rwa Nyarugenge, yavuze ko atagakwiye kubazwa ibyaha byakozwe na FNL ngo kuko ntaho yari ahuriye na yo.

Ibi Rusesabagina yabivuze nyuma y’umwanzuro w’Urukiko rw’Ibanze rwa Kicukiro wo kuwa 17 Nzeri 2020 wagenaga kumufunga by’agateganyo.

Rusesabagina kandi avuga ko kuba yarari mu bayobora impuzamashyaka MRCD-Ubumwe, bidakwiye guhuzwa n’ibyaha byakozwe n’umutwe ushinjwa iterabwoba wa FNL ngo kuko wo ufite ubuyobozi bwawo bwihariye. Yagize ati “Amashyaka yose agize MRCD-Ubumwe arigenga kandi afite ubuyobozi bwihariye. CNRD rishinzwe abasirikare, FLN yo ni abasirikare ba CNRD, twebwe rero nka PDR-Ihumure twari dushinzwe dipolomasi”.

Umunyamategeko Me David Rugaza wunganira Rusesabagina,we avuga ko ntacyo Urukiko rw’Ibanze rwa Kicukiro rwatangaje k’ububasha bwo kuburanisha ibi byaha biregwa Rusesabagina, agasaba Urukiko Rwisumbuye kwemeza ko ibyo urwa Kicukiro rwakoze bitari mu bubasha ruhabwa n’amategeko. Yagize ati”Turasaba Urukiko Rwisumbuye kwemeza ko Urukiko rw’Ibanze rwa Kicukiro rutari rufite ububasha bwo kuburanisha uru rubanza”.

Mu ngingo ya 11 y’Itegeko ryo muri 2012-2018 rishyiraho igitabo cy’amategeko ahana, ivuga ko uhamwa n’iki cyaha agomba kuba yaragikoreye mu Rwanda. Agendeye kuri iri tegeko, Me Rugaza avuga ko guhera muri 1997 kugeza uyu munsi Rusesabagina atari Umunyarwanda, kandi atari ari mu Rwanda kuva muri 1996 kugera mu Kanama 2020, bityo iri tegeko rikaba ritakurikizwa kuko icyaha Rusesabagina aregwa cyakozwe muri 2018.

Rusesabagina aregwa uruhare ku byaha byakozwe n’umutwe wa FLN birimo iby’iterabwoba, kwica, gutwikira abaturage no kubasahura hakoreshejwe intwaro mu turere twa Nyamagabe na Nyaruguru.

Leave a Reply

Your email address will not be published.