Malawi: Perezida mushya Lazarus Chakwera yarahiye nyuma y’intsinzi ye yanditse amateka.

POLITIKI
Sangiza iyi nkuru abandi

Yanditswe na MUTABAZI Fidele

Kuwa 28 Kamena 2020

None tariki ya 28 kamena 2020 nibwo perezida Lazarus Chakwera yarahiye nka Perezida mushya wa Malawi nyuma yo gutsinda amatora yasubiwemo.

Mu ijambo rye nyuma yo kurahira, Bwana Chakwera yagize ati: “Igihe kirageze ngo dukanguke ubundi inzozi zacu tuzihindure impamo”.

Bwana Chakwera, wari umukuru w’abatavuga rumwe n’ubutegetsi muri Malawi, yatangajwe ko yatsinze Perezida ucyuye igihe Peter Mutharika ku majwi 58.57% muri ayo matora yabaye ku wa kabiri, nkuko akanama k’amatora karaye kabitangaje.

Bwana Mutharika yavuze ko ayo matora yo ku wa kabiri ari yo “mabi cyane abayeho mu mateka ya demokarasi ya Malawi”.

Bwana Mutharika yavuze ko ayo matora yabayemo guhohotera, gukubita no kunyuruza indorerezi n’abategetsi bo mu ishyaka ryari ku butegetsi.

Mu kwezi kwa kabiri, urukiko rw’itegekonshinga rwaburijemo intsinzi ya Bwana Mutharika mu matora ya perezida yo mu kwezi kwa gatanu mu mwaka ushize wa 2019, ruvuga ko yabayemo uburiganya.

Abaturage b’iki gihugu bari bacitsemo ibice mbere y’aya matora yabaye muri iki cyumweru.

Iki kibaye igihugu cya kabiri muri Afurika kiburijemo amatora ya perezida kubera ibitaragenze neza, nyuma ya Kenya mu mwaka wa 2017.

Ejo ku wa gatandatu, nyuma y’itangazwa ry’ibyavuyemo mu matora, Bwana Chakwera yavuze ko intsinzi ye ari “intsinzi ya demokarasi n’ubutabera”, yongeraho ati: “Umutima wanjye wasabwe n’ibyishimo”.

Abamushyigikiye bigabije imihanda yo mu murwa mukuru Lilongwe, bavuza amahoni y’imodoka ari nako bacana imiriro (fireworks) yo kwishimira intsinzi yabo.

Mu ijambo rye nyuma yo kurahira, Bwana Chakwera yagize ati:

“Banya-Malawi bagenzi banjye, guhagarara imbere yanyu nka perezida wanyu uyu munsi ni icyubahiro”.

Yasezeranyije kunga ubumwe bw’igihugu no kurwanya ubukene.

Uyu mugabo w’imyaka 65 y’amavuko, wahoze ari umuvugabutumwa, ni umukuru w’ishyaka Malawi Congress Party (MCP) ritavuga rumwe n’ubutegetsi.

Yavukiye mu murwa mukuru Lilongwe, avuka ku mubyeyi w’umuhinzi gakondo.

Yize kaminuza mu bijyanye na filozofiya na tewolojiya muri Malawi, Afurika y’epfo na Leta Zunze Ubumwe z’Amerika.

Chakwera yongeye guhabwa amahirwe muri politike n’urukiko rw’itegekonshinga nyuma yo kugira impfabusa amatora yo mu mwaka ushize ruvuga ko yabayemo uburiganya.

Leave a Reply

Your email address will not be published.