Algeria:Urupfu rw’umukobwa wafashwe ku ngufu,akicwa n’umurambo we ugatwikwa rwakoze benshi ku mutima

MU MAHANGA
Sangiza iyi nkuru abandi

Mu gihugu cya Algeria imyigaragambyo y irakomeje mu mijyi myinshi, basaba ko hagira igikorwa ku rugomo rukorerwa abagore, nyuma yuko umukobwa w’imyaka 19 afashwe ku ngufu akanicwa ndetse murambo we ugatwikwa.

Umurambo wa Chaïma watwitswe ugahinduka umuyonga, wabonetse muri uku kwezi muri sitasiyo ya lisansi itagikorerwamo, mujyi wa Thénia, kuri 80km mu burasirazuba bw’umurwa mukuru Alger.

Ibitangazamakuru byo muri Algeria bivuga ko uwamwishe yemeye icyo cyaha kandi ko ubu yatawe muri yombi. Hari andi makuru avuga ko undi murambo w’umugore watwitswe ugahinduka amakara, watahuwe mu ishyamba mu ijoro ryacyeye.

Muri Algeria, abagore bakoze imyigaragambyo yo guteranira ahantu hamwe bakahaguma, batera hejuru basubiramo izina Chaïma, ari nako banasaba ko urugomo bakorerwa ruhagarara. Impirimbanyi zanakoresheje imbuga nkoranyambaga zikoresha interuro (hashtag) ivuga ngo ‘ndi Chaïma’ (#JeSuisChaima).

Izi mpirimbanyi zivuga ko ahabereye iyo myigaragambyo i Alger hari abapolisi benshi nubwo ititabiriwe cyane. Umwe mu bagore bitariye imyigaragambyo i Alger yagize ati:

“Iyi leta ntitanga ubuhungiro cyangwa uburyo bwo kurinda abahohotewe ababakorera iyicarubozo, iyi leta ivuga ko ifite amategeko, ariko mu by’ukuri abagore basabwa kubabarira ubahohotera, yaba musaza wabo cyangwa papa wabo cyangwa uwo ari we wese”.

Yakomeje avuga ko iyo abagore batanze ikirego bategereza imyaka itatu cyangwa ine ngo icyo baregeye gikemuke cyangwa umwanzuro w’urubanza utangazwe. Ati”Ibi ni ibintu bitakwihanganirwa. Algeria ni iy’abagabo n’abagore bo muri Algeria”.

Nyina wa Chaïma yavuze ko ukekwaho kumusambanya ku ngufu no kumwica, mu 2016 yari yaragerageje gufata ku ngufu uwo mukobwa we ubwo yari afite imyaka 15, ariko ikirego gihagararira aho.

Umuryango Femicides Algeria ukurikiranira hafi impfu nk’izo, uvuga ko kuva uyu mwaka watangira, muri Algeria abagore 38 bamaze kwicwa bazize kuba ari abagore.

Mu 2019, uyu muryango wabaruye abagore 60 bishwe, ariko wemeza ko umubare nyakuri wari hejuru cyane kurushaho kuko abagore benshi bicwa muri ubwo buryo ntibimenyekane.

Leave a Reply

Your email address will not be published.